“Yaşıl” şər imperiyası - Molla rejimi Bakıya düşmən kəsilib

ABŞ Prezidenti Ronald Reyqan düz 40 il bundan öncə – 1983-cü il martın 8-də Floridada çıxışı zamanı SSRİ-ni “şər imperiyası”, müasir dünyada “şərin mərkəzi” adlandırmışdı. Siyasi kəlama çevrilmiş bu deyim sovet rejiminin amorallığını və bu səbəbdən SSRİ ilə ABŞ-ın müqayisəsinin mümkünsüzlüyünü ehtiva edirdi. 

SSRİ planlı iqtisadiyyat üzrə bir sosialist cəmiyyəti qurmaq yolunu tutmuş dövlət idi. Ancaq fakt budur ki, bu dövlət artıq 32 ildir öz möv­cudluğunu dayandırıb. Sanki yerini cənub qonşusu, özünü islam respub­likası adlandıran İrana təhvil verib. Bəli, bu gün dünyada şər imperiya­sı adlandırılacaq ölkələrdən biri də məhz İrandır. Əgər Reyqan SSRİ-ni şər imperiyası adlandırmışdısa, bu gün mollalar müqəddəs İslam dininin rəmzi olan yaşıl rəng altında dinimizə zidd əməllərlə, şər əməllərlə məşğul­durlar.

İranda insanların əsas hüquq və azadlıqları kobud şəkildə pozulur, rejimə qarşı çıxanlar ən sərt şəkildə cəzalandırılır. Orta Şərqin bu ölkəsin­də XXI əsrdə əsl orta əsr zehniyyəti hakimdir.

İran “izqoy” dövlətlər siyahısında

Molla rejimi yarandığı 1979-cu ilin fevralından təcrid edilmiş – “izqoy” dövlətdir. Sivil dünya, müasir yanaş­ma İran kimi dövlətləri qəbul etmir. İran rejimi 1981-ci ilin noyabrında ABŞ səfirliyinə hücumu stimullaş­dırmaqla gerçək simasının nədən ibarət olduğunu bütün dünyaya nü­mayiş etdirib. Molla rejimi dünyanın bütün ölkələrindən gələn çağırışlara baxmayaraq, mənfur əməllərindən əl çəkmir.

Nəinki əl çəkmir, hətta onla­rı daha da genişləndirir. İran hazırda Yaxın və Orta Şərq regionunda gər­ginlik yaradan əsas ocaqdır. Körfəz ölkələri (Bəhreyn, Qətər, Küveyt, Birləşmiş Ərəb Əmirlikləri, Oman, Səudiyyə Ərəbistanı) İranın əlindən zinhara gəliblər. İran onların daxili işlərinə müdaxilə edir, məzhəbçilik amili əsasında bu ölkələrdə daxi­li qarşıdurma yaratmağa cəhd edir, son illərdə ərəb ölkələri və Türkiyə ilə münasibətləri inkişaf yoluna qədəm qoymuş İsraili Yer üzündən silməklə hədələyir.

Tehrana qarşı beynəlxalq koalisiyanın yaradılması aktuallaşıb

Hazırda dünyanın gündəmində olan əsas məsələlərdən biri də İrana qarşı beynəlxalq koalisiyanın yara­dılmasıdır. Son vaxtlar bu istiqamət­də çağırışlar daha da intensivləşib. ABŞ Müdafiə nazirinin köməkçisinin müavini Dana Struel bugünlərdə rəsmi Tehranın zərərli fəaliyyətinin qarşısını almaq üçün beynəlxalq ko­alisiya yaratmağa çağırıb.

Bu çağı­rış İranın uranın zənginləşdirilməsi ilə məşğul olan “Fordo” zavodunda zənginləşdirilmiş uran hissəciklərinin aşkarlanması və İran-Rusiya hərbi əməkdaşlığının davam etdirilməsi ilə bağlı hesabatların dərci ilə eyni vaxt­da baş tutub. “Biz elə bir mərhələ­dəyik ki, İran hökumətinin təhdidləri artıq Yaxın Şərqlə məhdudlaşmır və beynəlxalq çağırış sayılır”, – deyə D.Struel qeyd edib.

Bu çağırışdan dərhal sonra Teh­ran Beynəlxalq Atom Enerjisi Agent­liyinə (BAEA) nüvə obyektlərinin monitorinqinə və yoxlanılmasına ra­zılıq verib.

Agentliyin baş direktoru Rafael Qrossi martın 4-də Tehranda rəsmilərlə görüşlər keçirib. Qrossi buna nail olmağın çox vacib olduğu­nu vurğulayıb və əlavə edib ki, bu, İranın Hərtərəfli Birgə Fəaliyyət Planı çərçivəsində nüvə öhdəliklərini bərpa edəcəyi təqdirdə BAEA-ya lazım olan yeni əsasları yaratmağa başlamağa imkan verəcək. Görünür, təzyiq öz effektini verir.

Molla rejimi Bakıya düşmən kəsilib

İran Azərbaycanın müstəqillik qazanmasından üzü bəri ona hər zaman yumşaq desək, qısqanc mü­nasibət bəsləyib. 44 günlük Vətən müharibəsində qazandığımız Qələ­bədən sonra bu qısqanclığı aşkar düşmənçilik mövqeyi əvəzləyib. Baxmayaraq ki, İran formal olaraq bu qələbə münasibətilə Azərbaycanı təbrik edib.

İran Azərbaycana müna­sibətdə yaxın qonşuluq və dostluq əlaqələrini, İslam qardaşlığını heçə sayaraq ermənilərə qucaq açıb. Dün­yanın əksər sivil dövlətləri ilə düşmən olan İran onun üçün Avropaya açılan qapısı Azərbaycana münasibətdə tutduğu mövqe, yürütdüyü siyasət heç bir əndazəyə sığmır. Bu günlər­də yayılan məlumatda isə işğaldan azad olunmuş ərazilərin yenidən qurulmasının simvollarından sayılan Füzuli və Zəngilan hava limanlarının Tehrandakı ayətullahlar tərəfindən “imperialistlərin İrana qarşı istifadə olunacaq poliqonu” adlandırılması rejim mənsublarının hansı təfəkkürə malik olduqlarını bir daha ortaya qo­yur. Bu zehniyyəti izah etməkdə söz belə, acizdir.

Tehrandakı səfirliyimizə qarşı törədilən terror aktı, İrana işləyən casus şəbəkəsinin yetişdirilməsi, be­cərilən narkotikin Azərbaycana ötü­rülməsi, Zəngəzur dəhlizinin reallaş­masına əngəl yaradılması, Qafanda tələm-tələsik baş konsulluğun açıl­ması qərarının verilməsi və bunun həyata keçirilməsi molla rejiminin ölkəmizə münasibətdə yaxın-uzaq keçmişdə yol verdiyi əməllərin nata­mam siyahısıdır.

İran Azərbaycana münasi­bətdə hər zaman məkrli siyasət yürüdüb. Tarixi torpaqlarımızın şimal qonşumuzla birgə bölüşdü­rülməsi, ardınca soydaşlarımız arasında tarixin saxtalaşdırılma­sına çalışılması, ölkəmizin gücü əleyhinə ideoloji təlqin ritorikası­nın yürüdülməsi bu siyasəti tətik­ləyib. İndi isə Azərbaycanın tam müstəqil olması, güclənməsi, öz hərbi gücü hesabına torpaqları­nı işğaldan azad etməsi cənub qonşumuzu hiddətləndirib. Molla rejimi günlərin birində ölkəmizin iki əsr öncə itirdiyi torpaqlarına da dönüş edəcəyindən narahat­dır.

Üstəlik, şovinist ideologiya yürüdən bu ölkə regionda alter­nativ gücün formalaşmasından narahatdır. Bu gün Azərbaycan və Türkiyə ittifaqı regionda siyasi konfiqurasiyanı kökündən dəyi­şib, güclü Türk dünyası üçün əsl fundament formalaşdırıb, regi­onun əsas layihələrinin icraçısı və iştirakçısı olub. Uğurlarımızı həzm edə bilməyən, ölkəmizi qarşılıqlı reaksiya verməyə vadar edərək imicini pozmağa çalışan İran niyyətinə nail olmayacaq. Ancaq ən qısa zamanda etdiklə­rinin hesabını verəcək. Qardaşı Ermənistan kimi...

Züriyə Qarayeva

AZƏRBAYCANREALLIĞI.COM    

Bizimlə əlaqə WhatsApp (055) 8288841