“Heç onlar ana-bacılarını qoruya bilmirlər, o ki qaldı vətəni”

“Birinci Qarabağ müharibəsi dövründə görkəmli dramaturq Əli Əmirli “Bala başa bəla!” tamaşasının ssenarisini yazmışdı. Əsərdə qeyd olunurdu ki, nazir öz oğlunu müharibədən gizlətmək üçün onu qız kimi təqdim edir. Bu gün  həmin mövzu  çox aktualdır. Həqiqətən də bu günə qədər varlı, məmur balaları müharibədə döyüşməyib, heç indi də döyüşmürlər”. 

“Azərbaycan Reallığı" xəbər verir ki, bu sözləri qazi jurnalist Rey Kərimoğlu Moderator.az-a açıqlamasında bildirib. Rey Kərimoğlu bu cür halların hələ də olmasını böyük təəssüf hissi ilə qarşıladığını deyib: 

“Vətən hamımızındır. Necə olur nazir balaları ölkəni çapıb talamağı bacarır, amma vətən üçün heç nəyi bacarmaq istəmir? Söhbət tək məmur balalarından getmir. Yadınızdadırsa, Akif Çovdarov Tağı Əhmədovu qorxudub, ondan  3 milyon manat pul almışdı. Tağı Əhmədov  3 milyon pulu haradan alır? Oğlu da hakim işləyir.  

Yəni burada şəxsi keyfiyyət məsələləri var. İnsanın əxlaqı, tərbiyəsi olsa rüşvət almaz. Azərbaycan məmurlarını son iki-üç ilini çıxmaq şərti ilə əksəriyyəti rüşvət alıb, korrupsiya ilə məşğul olur.  Namussuz və tərbiyəsiz adam vətəni qorumaz. Heç onlar ana-bacılarını qoruya bilmirlər, o ki qaldı vətəni. Vətəni qorumaq ağır və şərəfli işdir.   

Vətənpərvər oğullar vətən uğrunda döyüşür. Lakin görəndə ki, şəhidlərin demək olar  ki, böyük əksəriyyəti kasıb övladlarıdır, onda insanların qəlbinə inciklik düşür ki, niyə ancaq kasıb balaları niyə döyüşür, şəhid olur? Digər tərəfdən Türkiyədə şəhidlər çıxan evlərə baxırsınızmı? Orada da görürük ki, əksər şəhidlər kasıb övladlarıdır. Hər zaman belə olub, bu məsələni qabardıb bir nəticə almaq olmaz. Ona görə də onun ictimailəşdirilməsi, gündəmə gəlməsi yaxşı hal deyil.  

Ad  çəkmək istəməzdim, amma Tağı Əhmədovun, Ziya Məmmədovun, Misir Mərdanovun və digər məmurların məgər oğlanları yoxdur? Varsa, niyə gedib müharibədə döyüşmədilər? Hesab edirəm ki, onların övladlarının hərbi xidmətdə qeydiyyatda olub,  özləri isə  eyş- işrətlə məşğul olublar.  Bu boyda  hərbi xidmətə çağırış  oldu, ölkədə terror hadisələri yaşandı,  müharibə başladı, ancaq onlardan səs çıxmadı. Guya ki, bir-ikisi gedib hərbi komissarlığa müraciət etdi, oradan şəkil çəkdirib paylaşdı, vəssalam. Müharibə zamanı biz onları görmədik. Mən özüm 6 nəfər qazimizlə birgə II Qarabağ müharibəsində N saylı hərbi hissədə xidmətdə idim. Orada  məmur, nazir balası  görmədik. Onları heç gözləmirdim də.  Vətən, torpaq məsələsi namus, qeyrət məsələsidir, onlar isə rüşvət, haramçılıqla böyümüş uşaqlardır”. 

AZƏRBAYCANREALLIĞI.COM