Lerik rayon Təhsil Şöbəsindən təhsilin “RUHUNA FATİHƏ”: Korrupsiya və özbaşınalıq TÜĞYAN EDİR

07, 06, 21
14:00

Lerik rayon Təhsil Şöbəsindən təhsilin “RUHUNA FATİHƏ”: Korrupsiya və özbaşınalıq TÜĞYAN EDİR


Azərbaycanın təhsil sistemi özünəməxsus xüsusiyyətləri ilə vətəndaşlarımızı mat qoymaqda davam edir. Dünya üzrə texnologiyadan daha sürətli nə inkişaf edir deyə soruşsalar, düşünmədən deməliyik ki, bu bizim təhsil sistemimizdir. Yox düşünüb cavab versək o zaman, əsəb sistemimiz təhsil sistemimizin gününə qalacaq. 

Biz aktual problemləri ümumiləşdirib şablonlarla ifadə etmək istəmirik. Hamısını ayrı-ayrılıqda təhlil etmək, iddiaları araşdırmaq şəffaflıq baxımından vacibdir. Çünki, bu xəstələnmiş sistemin təhsil şöbəsi ayrı, direktoru ayrı, müəllimləri ayrı dərddir. Pis hal odur ki, koronavirus kimi yayılan bu xəstəlik təhsilimizi öldürmür, süründürür.

Bu yaxınlarda, Lerik rayon Təhsil Şöbəsinin Müdiri Salayev Zöhrab deyib ki, mən vəzifəyə gələndən bəri şöbədə neqativ tərkibli, korrupsiyalı cinayətlər yoxdur. Müdir bu qeyri-adi hadisənin səbəbini belə izah edib ki, o, hər zaman məktəb direktorları və müəllimlər üçün DUA edir.  Vay-vay, deyəsən, müdir özü üçün dua etməyi unudub…
 
Bu danışığın üzərindən az keçmiş müdir Lerik rayon Murya kənd tam orta məktəbin direktoru Əhməd Əhmədovu yanına çağırıb və deyib ki, mən Bakıya gedəcəm, iki hörmətli yoldaşa “çörək verib” yola salmaq lazımdır. Çörək müqəddəsdir, kiməsə çörək vermək savab işdir, amma və lakin… Kiminsə çörəyini alıb başqasına vermək necə işdir, hörmətli müdir?

Çörək məclisində spirtli içki qəbul etdikdən sonra Əhməd Əhmədov qərara gəlib ki, “sandıqdakı pambıqlara” azadlıq versin. O qədər dəyərli “ağ qızıl”a rəvamıdır gün üzünə həsrət qalsın? İnsaf da yaxşı şeydir…Direktor etiraf edib ki, hər bir məktəb direktoru ayda Zöhrab müəllimə 200 AZN şirinlik verir. Sanmırıq ki, Zöhrab Salayev burada neqativ tərkibli, korrupsiya cinayətinə yol verir. Axı, müdirin duaları həmişə sizinlədir, hörmətli direktorlar.
 
Koronavirus Lerik rayonuna da düşərli olmayıb. İnternetin olmaması səbəbindən onlayn formatda dərslərin keçirilməsi mümkün olmayıb. Düşünürük ki. Zöhrab bəy Azərbaycan gələcəyinin əsas kadrları üçün səmimi qəlbdən narahatdır və onlar üçün də bolluca dua edib. Görəsən, şagirdlər də müdir üçün dua edirmi?

Əhməd müəllim deyib ki, Zöhrab bəy Balaşir bəydən daha yaxşıdır. Hətta Cəlil müəllim də “yeyən” imiş. O, onlayn təhsilin olmamasını isə birbaşa Vəligüllah müəllimlə əlaqələndirib. Onun məsuliyyətsizliyi, iş fəaliyyətinin səmərəsizliyi haqqında şikayətlənib. Yəqin ki, Əhməd müəllim Zöhrab müəllimdən onlayn təhsilin rifahı üçün dua etməsini xaiş edəcək. Yoxsa Lerik də vəziyyət çətindir. Pandemiya nə qədər davam edəcək, bunu heç kim bilmir.

Əhməd Əhmədov qonaqlığın bitməsindən sonra içkili halda “Chevrolet Niva” markalı avtomobilində sükan arxasına əyləşib. Bu özgüvənin, cəsarətin hardan gəldiyini izah edərkən açıqlayıb ki, Şəkidəki yüksək vəzifəli qohumuna güvənir.

Azərbaycan təhsilinin bugünki vəziyyəti bizim illər sonrakı taleyimizin təməlidir. İçki məclislərində həll edilən müqəddəratlar, müzakirə edilən qanunsuzluqlar, edilən iyrənc etiraflar ürək bulandırır. Ümid edirik ki, Lerik rayon təhsil söbəsində həm müdir, həm də direktor vəzifələrinin icrasında islahatlar aparılacaq, araşdırmalar ediləcək. Ya dövlət tərəfindən, ya da müdir Zöhrab Salayev tərəfindən. Zöhrab bəyin ilk görəcəyi iş Əhməd Əhmədovun spirtli içkilərdən uzaqlaşması üçün dua etməkdir. Yoxsa, vay sizin halınıza…

Təəssüf ki, hər şey bunlarla bitmir. Ardı var…

Azerbaycanrealligi.com

Bizimlə əlaqə saxlayın