Yazar Zümrüd Yağmur: "Mənə övladlarımla hədə gəlirsiniz? Budur sizin ləyaqət anlayışınız?"

Azerbaycanrealligi.com xəbər verir ki, tanınmış xanım yazar Zümrüd Yağmur ona və övladlarına edilən təhdidlər bağlı öz facebook hesabında status paylaşıb. Həmin statusda onun övladları ilə kimlərinsə maraqlaması diqqəti cəlb edir. Sözügedən statusu olduğu kimi qeyd edirik. Onu əlavə edək ki, Zümrüd Yağmur hal-hazırda həbsdə olan AXCP partiyasının sədr müavini siyasi məhbus Fuad Qəhrəmanlının həyat yoldaşıdır.

İllərdir bu ölkədə olanlara qarşı, hakimiyyətin ədalətsiz idarəetməsinə, yaramazlığına, haqsızlığına və talançılığına qarşı yazıram. Hətta İlham Əliyevə açıq məktub belə yazmışam. Amma bir dəfə də olsun nəsə təhqir və ya kiminsə ailə üzvlərinə yönələn hədyan, qıçıq doğuran söz yazmadım. Çünki məni kimin neçə uşağı olduğu, ya da kimin necə ata, necə ana olduğu da maraqlandırmayıb. 

Bəs sizi niyə mənim övladlarım maraqlandırır? Niyə onların adını çəkirsiz? Hansı məmurdu o deyən ki, ləyaqətlə mübarizə aparmaq lazımdı. Budur sizin ləyaqət anlayışınız, mənə övladlarımla hədə gəlirsiniz?

Ləyaqət və şərəfdən dəm vuranlar, özünüzə gəlin! Hər şeyə sahib olmaq olar, pula, gücə, hakimiyyətə, amma hər nə qədər olursa-olsun, bir "olmaz" nöqtəsi olmalıdır axı... 

Əgər özünüzü haqlı hesab edirsinizsə, niyə mənim məhbusları müdafiə etməm sizi bu qədər qəzəbləndirir? 
Mən öz etikam və prinsiplərimdən geri durub sizin övladlarınız haqqında nəsə yazmayacaq, amma siz də mənə övladlarımla bağlı ehyam dolu hədələr göndərməyi kəsin.

Sübut edin ki, şərəf adına nəsə qalıb bu ölkədə...

Azerbaycanrealligi.com