İranın “Bakıdan Tehrana uçan terrorçu” ssenarisinin hədəfi - Molla rejimi NƏYƏ NAİL OLMAQ İSTƏYİR

Dünya / Manşet
 8-11-2022, 13:00     739


İran Şahçıraq terrorunda Azərbaycanın adını dövriyyəyə buraxıb. Terror əməliyyatının “baş koordinator”unun Azərbaycan vətəndaşı olması və Bakı hava limanından İmam Xomeyni aeroportuna uçduğu iddiasında Tehranın hədəfi də aydın görünür: bu, 44 günlük müharibədə ortaya atılan “terrorçu” iddialarının davamı və iddianın praktiki mərhələyə köçürülməsidir;

Bundan öncə Araz bölgəsindən keçən “terrorçuları” saxladılar, indi də Bakıdan uçan terrorunun zəvvarları güllələdiyi iddiasını ortaya atıblar.

Şahçıraq terroru baş verəndə yazmışdıq: etirazların geniş vüsət aldığı vaxt terrorçuların niyə məhz zəvvarları hədəf seçdiyi şübhəlidir və istisna deyil ki, terrorun arxasında məqsədinə nail olmaq istəyən rejimin özü dayanır; bununla etirazların baş verdiyi vaxt “xarici təhlükə”ni gücləndirir, “təhlükəsizliyi qorumaq” üçün aksiyalara qarşı silah gücünün tətbiqini legitmləşdirir, zəvvarların hədəf seçilməsi ilə mollaların dayaqlarını möhkəmləndirir;

Arazdan “terrorçuların” keçməsi və Şahçıraq aktında “baş terrorçu”nun Bakıdan uçması iddiaları Azərbaycanı “regionda terror ixrac edən” ölkə kimi göstərməyə hesablanıb. Və İran rejimi həm də bununla:

Ölkə daxilində Azərbaycanın düşmən obrazını yaradır: bu, güneydə milli hərəkatın genişlənməsinə qarşı da düşünülmüş ssenaridir;
- “Terrora qarşı mübarizə” adı altında Azərbaycana qarşı mümkün müdaxilə ssenarilərinə əsaslar formalaşdırır;

Lakin bu terror iddiaları “əsaslar” yaratmağa bəs etmir, bu baxımdan, davamlı olacağı istisna deyil. Ssenariləri, qurmaq istədikləri oyunlar çox açıqdır. 

İranın Kəşfiyyat Nazirliyi Şirazdakı Şahçıraq ziyarətgahında törədilən terror aktına görə Azərbaycanı ittiham edən bəyanat yayımlayıb.

Bəyanata əsasən, terror aktını İŞİD-lə əlaqəli olan, Azərbaycan, Tacikistan və Əfqanıstan vətəndaşları törədiblər və proseslər Azərbaycandan yönləndirilib.

Teokratik rejim hələ Azərbaycanla bağlı başqa ittihamlarını sübut edən bir dənə də normal dəlil ortaya qoymayıb. 44 günlük Vətən müharibəsi və ondan sonrakı dövrdə İran əzbərlənmiş fərziyyələrlə regionda terrorçu ünsürlərin olduğunu bildirdi, lakin bunu təsdiq edən faktlar yoxdur.

İndi İran ölkə daxilindəki “sunami”nin qarşısını almaqda çətinlik çəkdiyindən diqqətləri gərginlik yaşadığı Azərbaycanın üzərinə yönəltmək və terrorçuluğa dair iddialarını “sübuta yetirmək” istəyir.

İran həm də ölkədə siyasi şiəlik hərəkatını terror amili ilə birləşdirməyi hədəfləyir, bu mənada Şirazdakı terrorda ən böyük şübhə elə molla rejiminin üzərinə yönəlir.

İranın terror aktı ilə bağlı məsələni Azərbaycanla əlaqələndirməsi Dövlət Təhlükəsizliyi Xidmətinin (DTX) Tehranın Bakıya qarşı kəşfiyyat-pozuculuq fəaliyyətini ifşa edən məlumatları yayımlamasından sonra baş tutdu.

Bu, təsadüfi bir qarşılaşdırma deyil və İran Azərbaycana öz aləmində əks-hücum həyata keçirdiyinin işarəsini verir.


Tehran ölkədə iğtişaşlar başlayandan bəri bunun mənbəyini həmişəki kimi xarici qüvvələrə proyeksiya edir və Azərbaycanı da özünün bu ittihamının içərisində saxlayırdı.

Terror hadisəsində Azərbaycan izi axtarmaqla molla rejimi özünün boş və dişsiz fərziyyələrinə dünya ictimaiyyətini və daxili auditoriyanı inandırmaq məqsədləri güdür. 

AZƏRBAYCANREALLIĞI.COM