Sahil Babayevdən SƏRSƏM TƏYİNAT: İmtahandan kəsilən Ayaz Rəhimov regional şöbəyə rəis göndərildi - FOTO

Dövlət Əmək Müfəttişliyi Xidmətinin Gəncə Regional şöbəsinin rəisi Ayaz Rəhimovun əmək müqaviləsi necə saxtalaşdırılıb… 

Nazirlər Kabinetində şöbə müdiri vəzifəsində işləyən qardaşı Niyazi Rəhimovun bu qanunsuzluqların həyata keçirilməsində ona nə kimi dəstəyi olub?

Azerbaycanrealligi.com bildirir ki, Gəncə şəhər sakini Ələsgərov Sənan Bəhman oğlu tərəfindən “Hürriyyət”in redaksiyasına şikayət məktubu daxil olub. Qəzetimiz vasitəsilə Prezident İlham Əliyevə müraciət edən şikayətçinin məktubunu olduğu kimi təqdim edirik:

“Azərbaycan Respublikası vətəndaşlarının dövlət qulluğuna aid olan vəzifələrə qəbulu və işdən çıxarılması “Dövlət qulluğu haqqında” Azərbaycan Respublikasının qanunu ilə tənzimlənir. Lakin Ayaz və Niyazi Rəhimov qardaşlarına bu qanunvericilik aktları tətbiq olunmur. Onlar istədikləri zaman dövlət qulluğuna aid vəzifələrə imtahansız qəbul olunurlar.

Ayaz Rəhimov

A.Rəhimov hazırda 21 saylı region üzrə Dövlət Əmək Müfəttişliyinin rəisi vəzifəsində çalışır. Onun əmək fəaliyyətinə nəzər yetirsək, qanunsuz əməllərinə şahid olarıq. O, 23 aprel 2012-ci il tarixli, 1E1X02R000100 nömrəli müddətsiz əmək mü-qaviləsinə əsasən, Azərbaycan Respublikasının Standartlaşdırma, Meteorologiya və Patent üzrə Dövlət Komitəsinin Təcrübə-Sınaq (AzTEST) Mərkəzinin Gəncə ərazi sınaq və sertifikatlaşdırma şöbəsinə sektor müdiri vəzifəsinə qəbul olunub. Daha sonra onun müqaviləsinə dəyişiklik edilərək, əlavə iş yeri kimi 1E1X02R000101 nömrəli müddətli əmək müqaviləsi ilə həmin şöbənin bölmə müdiri vəzifəsinə keçirilib. 01 noyabr 2015-ci il tarixli, 1E1X02R000200 nömrəli müddətli əmək müqaviləsinə əsasən, o, həmin Komitə yanında Texniki Tənzimləmə və Standartlaşma üzrə Dövlət Nəzarəti Xidmətinə baş məsləhətçi vəzifəsinə qəbul olunub. Bu vəzifə dövlət qulluğuna aid vəzifə olduğundan, A.Rəhimov müsabiqə və müsahibədən keçə bilmədiyinə görə, uzun müddət bu vəzifədə müddətli əmək müqaviləsi ilə çalışıb və dövlət qulluqçusu statusu qazana bilməyib. Elə buna görə də, ona vəzifə maaşına əlavələr hesablanmayıb.

17 aprel 2017-ci il tarixdə bu vəzifədən azad olunub və əmək müqaviləsinə Azərbaycan  Respublikasının Əmək Məcəlləsinin 70-ci maddəsinin “a”bəndinə əsasən, müəssisənin ləğvi ilə əlaqədar olaraq xitam verilib. Həmçinin, “AzSert” MMC-də əlavə iş yeri olaraq çalışıb.

Ölkə qanunvericiliyinə görə, dövlət qulluğuna aid vəzifə tutan şəxslərin müəyyən elmi və pedaqoji fəaliyyətlər istisna olmaqla, əlavə iş yerində çalışması qadağan edilmişdir. Lakin komitədə məsul vəzifə tutan Niyazi Rəhimov qardaşı Ayaz Rəhimovu qanunvericiliyin bu məhdudiyyətindən azad edib. O, 01 noyabr  2015-ci il tarixli, 1E1X02R000300 nömrəli müddətli əmək müqaviləsinə əsasən, “AzSert” MMC-də audit vəzifəsinə təyin etdirib. 21 iyun 2016-cı il tarixli, 1E1X02R000301 nömrəli müddətli əmək müqaviləsinə əsasən, növbəti müddətə əlavə iş yerində əmək fəaliyyətini davam etdirib. Həmin əmək müqaviləsinə 11 may 2017-ci il tarixdə Azərbaycan  Respublikasının Əmək Məcəlləsinin 68-ci maddəsinin “a” bəndinə əsasən xitam verilib.

12 may 2017-ci il tarixli, 1E1X02R000400 nömrəli müddətli əmək müqaviləsi ilə “Azərbaycan Standartlaşdırma İnstitutu” Publik Hüquqi Şəxsinə aparıcı-auditor vəzifəsinə qəbul olunub. İşəgötürənin 11 sentyabr 2018-ci il tarixli müvafiq əmri ilə bu vəzifədən azad olunub və onunla bağlanmış əmək müqaviləsinə Azərbaycan Respublikasının Əmək Məcəlləsinin 68-ci maddəsinin “a” bəndinə əsasən xitam verilib. Ayaz və Niyazi Rəhimov qardaşları Azərbaycan Respublikasının Standartlaşdırma, Meteorologiya və Patent üzrə Dövlət Komitəsinin ləğvindən sonra öz şəxsi biznes fəaliyyətlərini “AQROSERT” MMC-də (VÖEN 1003957541) davam etdiriblər. Niyazi Rəhimov uzun müddət Azərbaycan Respublikasının Standartlaşdırma, Meteorologiya və Patent üzrə Dövlət Komitəsinin Aparat rəhbərinin müavini vəzifəsində çalışıb. Ayaz  Rəhimov 29 sentyabr 2018-ci il tarixdə “AQROSERT” MMC-nin direktoru vəzifəsinə təyin olunub. Onun bu təyinatı saxtalaşdırılıb. 31 mart 2019-cu il tarixli, 1E1X02R000300 nömrəli müddətli əmək müqaviləsi bildirişi 29 sentyabr 2018-ci tarixdə Azərbaycan Respublikası Əmək və Əhalinin Sosial Müdafiəsi Nazirliyinin Əmək Müqaviləsi Bildirişi üzrə Elektron İnformasiya Sisteminə daxil olunub. Saxtalaşdırma bununla da bitməyib. O, həmin cəmiyyətdə tutduğu direktor vəzifəsindən 26 dekabr 2018-ci il tarixdə “Dövlət qulluğu haqqında “ Azərbaycan Respublikası qanununun 33.1.1. maddəsi ilə azad olunub. Nazirliyin elektron informasiya sistemində xitam 27 dekabr 2018-ci il tarixli, 1E1X02R0005X0 nömrəli bildirişlə qeydə alınıb. Onun əmək müqaviləsi gələcəkdə rəhbər vəzifəyə təyinat ala bilməsi üçün saxtalaşdırılıb və nazirliyin Əmək Müqaviləsi Bildirişi üzrə Elektron İnformasiya Sistemində əvvəlki tarixə rəsmiləşdirilib.

A.Rəhimovun eyni vaxtda ayrı-ayrı iki iş yerində əsas iş yerində işləməsinə dair əmək müqaviləsi bildirişinin nazirliyin elektron informasiya portalına daxil edilməsi korrupsiya halını təsdiq edən faktdır.

Digər bir saxtakarlıq isə, qanunazidd olaraq dövlət qulluğuna aid olmayan bir fəaliyyət sahəsində çalışan Ayaz Rəhimovun işə qəbulu və işdən azad olunması Azərbaycan Respublikasının Əmək Məcəlləsinin müvafiq 68 maddəsinin 2- ci hissəsinin “a” bəndinə əsasən yox, “Dövlət qulluğu haqqında” Azərbaycan Respublikası qanununa istinad olunaraq həyata keçirilmişdir. Bu hal qanunvericiliklə qadağan olunub və yolverilməzdir.

Tərəfimdən Azərbaycan Respublikası Dövlət İmtahan Mərkəzinə 16  oktyabr 2019-cu il tarixdə etdiyim rəsmi müraciətə cavab olaraq İmtahan Mərkəzi tərəfindən daxil olmuş 28 dekabr 2019-cu il tarixli 03/08-22/4635 saylı məktubda bildirilmişdir: “Müsahibələrdə şəffaflığın təmin edilməsinə nümunə olaraq məktubunuzda adını çəkdiyiniz Ayaz Süleyman oğlu Rəhimovla keçirilən müsahibəni qeyd etmək olar. A.S.Rəhimov 30.05.2019-cu il və 06.11.2019-cu il tarixlərində dövlət qulluğuna qəbul üzrə keçirilən ümumi müsahibələrdə iştirak etmiş, müsahibə komissiyasının rəyinə əsasən, iddia etdiyi vəzifələrə uyğun hesab edilməmişdir”.

Buna baxmayaraq, Ayaz Rəhimov 2018-ci ilin dekabr ayından rəis vəzifəsinə uyğun olmadığı halda hal-hazırda Azərbaycan Respublikası Nazirlər Kabinetində şöbə müdiri vəzifəsində işləyən Niyazi Rəhimovun qardaşı olduğu üçün nazir Sahil Babayev tərəfindən qanunvericiliyin tələbləri pozularaq ƏƏSMN-nin yanında Dövlət Əmək Müfəttişliyi Xidmətinin Gəncə Regional şöbəsinin rəisi vəzifəsində işləyir.

Cənab Prezident!

Çıxışlarınızda dəfələrlə yüksək vəzifəli məmurlar tərəfindən qanunlarımızın pozulmamasını, məmur-vətəndaş münasibətlərində vətəndaş məmnunluğunun yaradılmasını, qohumbazlığın və korrupsiya hallarının qarşısının alınmasını qeyd etməyinizə baxmayaraq, ƏƏSMN-də qanunların pozulması və vətəndaşların konstitusion hüquqlarının pozulması halları nazir Sahil Babayev tərəfindən davam etdirilir. Xalqda dövlətə qarşı inamsızlıq yaradır”.

Qarşı tərəfin mövqeyini dinləməyə hazırıq…

Azerbaycanrealligi.com